MARUFUKU MABANGO YA WAGANGA WA KIENYEJI TANZANIA

Serikali imepiga marufuku na kutaka kuondolewa mara moja mabango yote ya wataalam wa tiba asili yanayojitangaza kutibu maradhi ambayo hayajathibitishwa kitaalamu yaliyobandikwa maeneo mbalimbali nchini huku baadhi ya wabunge wakitishia kukwamisha bajeti ya wizara ya fedha endapo wizara hiyo haitatoa kiasi cha fedha cha zaidi ya asilimia 50 ya bajeti ya wizara ya afya na ustawi wa jamii.

Wakichangia mjadala wa bajeti ya wizara ya maji mara baada ya waziri mwenye dhamana pamoja na kamati ya bunge na kambi ya upinzani bungeni kuwasilisha maoni yao siku ya Jumamosi iliyopita baadhi ya wabunge wamesema licha ya kuwa Tanzania ina maeneo ambayo yanajulikana kuwa na matatizo makubwa ya maji kutokana na ukame bado mawaziri hao wamejitengea kiasi kikubwa cha fedha kutekeleza miradi ya maji licha ya kuwa maeneo hayo yanaunafuu ya upatikanaji wa maji pamoja na idadi ndogo ya watu.

Pia baadhi yao wamezitupia lawama mamlaka za miji za maji kwa kushindwa kutoa huduma ya maji kwa wananchi huku wafanyabiashara wa maji wanaotumia malori wakipata maji na kuwauzia wananchi kwa bei kubwa huku baadhi yao wakidhamiria kutoa hoja binafsi bungeni kujadili kauli ya waziri aliyoitoa bungeni kuwa tatizo la maji jijini Dar es salaam limepungua.

Mara baada ya bajeti ya wizara ya maji kupitishwa na bunge wizara ya afya na ustawi wa jamii hii leo nayo imewasilisha hotuba ya bajeti yake bungeni mjini Dodoma.